जनकपुरधाम । मधेश आन्दोलनका शहिद परिवार तथा घाइतेहरूको हक, अधिकारको सुनिश्चिता गर्न माग गर्दै मधेशी शहिद एवं घाइते हकहित संघर्ष समितिले जनकपुरधाममा प्रदर्शन गरेको छ ।
सोमवार जनकपुरधामको विभिन्न चोकको प्रदर्शन गर्दै जनक जनक चोकमा गरिएको कोण सभामा प्रदर्शनकारिहरुले शहिद परिवारका सदस्य तथा आन्दोलनका क्रममा घाइते भएकाहरूले राज्यले शहिद र घाइतेहरूको योगदानको उचित सम्मान नगरेको भन्दै असन्तुष्टि व्यक्त गरेका हुन् । उनीहरूले शहिद परिवार तथा घाइतेहरूको शिक्षा, स्वास्थ्य र रोजगारीको ग्यारेन्टी गर्न सरकारसँग माग गरेका छन् ।
समितिले मधेश आन्दोलनका शहिद तथा घाइतेहरूको हित संरक्षणका लागि छुट्टै ऐन–कानुन निर्माण गर्नुपर्ने र मधेशी शहिद प्रतिष्ठानलाई स्वायत्त संस्थाका रूपमा सञ्चालन गर्नुपर्ने मागसमेत अघि सारेको छ ।
साथै, शहिद परिवार तथा घाइतेहरूको जीवनयापन सहज बनाउन भरणपोषण भत्ता लागू गर्नुपर्ने माग पनि प्रदर्शनमार्फत उठाइएको छ । संघर्ष समितिका अध्यक्ष तथा मधेशी शहिद प्रतिष्ठानका सदस्य अवधेशप्रसाद पटेलले मधेश आन्दोलनमा बलिदान दिने शहिद र घाइतेहरूको योगदानलाई राज्यले उचित रूपमा मूल्याङ्कन गर्न नसकेको आरोप लगाए ।
आन्दोलनका क्रममा ज्यान गुमाएका तथा घाइते भएका व्यक्तिका परिवारप्रति राज्यले विशेष जिम्मेवारी निर्वाह गर्नुपर्ने भए पनि बेवास्ता भइरहेको उनको भनाइ थियो । शहिद परिवार र घाइतेहरूको मागप्रति संघीय तथा प्रदेश सरकार गम्भीर नभए सशक्त आन्दोलनका कार्यक्रम गर्ने उनले चेतावनी समेत दिए ।
सम्बन्धित खबर
